Music

Productor hoben cu oportunidad pa siña mas con pa produci musica na Inglatera

Written by Super User. Posted in music

Marc Erasmus, miho conoci como Marc Era, ta un hoben cu ta produci musica y e tin un soño pa bay e Masterclass Training na Inglatera pa siña for di e productornan renombra manera Curtis Caine, Tom Jones, kendenan lo ta dunando les. E meta di e training aki pa Marc Era ta pa haya mas experencia y bin bek Aruba pa asina colabora cu otro artistanan. Pero tambe yuda artistanan cu ta aspira pa tin un careda den musica y colabora cu otro productornan.
E lo ta den un training intensivo di 1 siman, pero na mes momento e lo presencia un congreso cu productornan renombra ta bini hunto. Pa Marc Era esaki ta un oportunidad p’e por papia cu e productornan y representa Aruba. E hoben ta produci canticanan y a haya oportunidad di traha cu otro productornan local. Aworaki e tin un proyecto cu Alves y ta orguyoso di a colabora cu hopi hende na Aruba.

 
Su interes pa musica a cuminsa ora e tabatin 8 aña y a cuminsa toca guitara, pero cu su 11 aña Marc Era tabata curioso pa sa kico ta DJ. Su tata kende tabata un DJ a splica y siña Marc e cosnan basico, unda cu e mes a cuminsa experimenta con pa ta DJ y mix cantica. Su interes a sigui y el a cuminsa traha su propio canticanan original. El a logra haci esaki su mes sin ayudo y sin experencia y te cu e fecha di awe e ta produciendo y creando musica.
E tin un meta financiero pa asina cubri e costo di e Masterclass Training y pa logra esaki e ta pidiendo pueblo di Aruba pa un sosten p’e logra su meta door di share su storia via social media pa asina por yega na esunnan cu por haci un donacion na su causa. Esunnan cu ta desea di haci donacion por manda esaki na su cuenta bancario y por haya e informacion aki riba su facebook page personal of fan page Marc Era Music. Otro manera pa haci donacion ta door di cumpra su arte y musica.