Despues di documentario di HBO di alegacion di abuso di mucha

Stacionnan di radio ta prohibiendo canticanan di Michael Jackson

Stacionnan di radio na Canada, New Zealand y Australia ta kita canticanan di Michael Jackson di nan playlist despues cu 2 homber a alega den un documentario nobo cu e defunto cantante a abusa di nan. E compania Canades Cogeco Media cu tin hopi stacion di e idioma Frances a kita canticanan di Jackson, asina e compania a confirma CNBC.

Australian Nova Entertainment Group tambe a kita e canticanan for di stacionnan cu ta inclui Smooth FM, segun Sydney Morning Herald. NZME y Mediaworks cu tin e stacionnan di radio mas grandi di New Zealand, tambe a kita diaranson e canticanan di e strea di su playlist, segun New Zealand Herald.

Den “Leaving Neverland: Michael Jackson and me” e di dos parti di e documentario di HBO pasa na Merca y Inglatera e siman aki, Wade Robson y James Safechuck ta alega cu e cantante a abusa di nan na e edad di 7 y 10. E patrimonio di Jackson a yama e documental un “public lynching” y a haci un demanda di $ 100 miyon contra HBO. E famia a nenga e acusacionnan. Anteriormente a absolve Jackson di e cargonan di abuso sexual infantil na 2005 y el a fayece na 2009.

Christine Dicaire, directora di comunciacion y marketing di Cogeco Media, a bisa den un comunicado cu el a email CNBC: “Nos ta pendiente na e comentarionan di nos oyente, y e documental publica diadomingo anochi a provoca reaccionnan. Nos a prefera di observa e situacion elimanando e canticanan di nos stacionnan, p’e tempo aki.”

Aña pasa, Sony Music Entertainment a gasta un total di $ 250 miyon riba e derecho di e catagolo di Jackson, un inversion cu por keda afecta despues cu a saca e documental, segun Wall Street Journal a publica. NZME y Mediaworks no a duna comentario na CNBC na momento di e publicacion.