Sports

Cristiano Ronaldo ta haya 1 miyon dollar pa cada producto promovi riba Instagram

Written by Super User. Posted in sports

E strea di futbol Cristiano Ronaldo ta na top di Sports Rich List 2019 di Instagram, a wordo revela cu el a ricibi $975,000 pa post pa promove productonan for di e companianan riba e plataforma social aki.
Di acuerdo cu e specialista di red social Hopper HQ, Ronaldo no solamente ta na top riba rivalnan, incluyendo e delantero di Barcelona y Argentina Lionel Messi, pero tambe e ta dilanti di nombernan grandi di deporte Mericano manera Lebron James.

Ronaldo ta hungando awo na Italia pa Juventus, y e tin un cantidad substancialmente mas hopi di siguidonan riba su Instagram cu su ekipo mes tin. E tin 177 miyon di siguido mientras cu su club tin 29.5 siguido.
Di dos riba e lista tras di Ronaldo ta e delantero Brasilero Neymar jr cu ta cobra $722,000 pa un post comercial riba  Instagram.
Na di tres luga ta Messi, kende apesar di tin rond di 2 miyon mas siguido cu Neymar jr., e ta ricibi rond di 74 mil dollar pa promove un producto riba Instagram.
“Ta increible con hopi influencia e profesionalnan ey tin riba nan siguidonan, y for di punto di bista di e productonan, e propagandanan ey paga ta bal cada placa cu paga,” asina e cofundador di Hopper HG Mike Bander a bisa awe diabierna.
Esun na di cuatro luga ta hopi leu. Ta trata di David Beckham, futbolista retira seis aña pasa, y e tin 57 miyon siguido, y e ta haya $357,000 pa subi productonan di marcanan cu e ta representa.
E prome riba e lista cu no ta futbolista ta LeBron James, na di cinco luga. E ta hunga basketball na Los Angeles y ta haya 272 mil dollar pa cada post publicitario.
E prome hende muhe riba e lista ta e ex bringado di “Ultimate Fighting Championship” (UFC) Ronda Rousey, kende awor ta aparece den luchamento profesional cu World Wrestling Entertainment (WWE). E ta na di diescinco luga di e lista y ta haya $67,700 pa un post di Instagram, net un puesto prome cu e ganado di 23 grand slam di tennis Serena Williams, kende ta cobra $60,500.