Trendz

Ora cu cumpra wega pa mucha, sigui e reglanan di edad riba e caha

Written by Super User. Posted in trendz

Video games tin stempel cu ta marca cu e wega ta valido pa muchanan di ki edad, mayoria biaha esaki ta basa riba e nivel di violencia, lenguahe pisa y contenido sexual. Pero esaki no ta e unico guia pa tene na cuenta.
Un grupo di e industria yama Entertainment Software Rating Board (ESRB) ta esun cu ta pone e ratings, ta wak e box di e video gama of informacion riba e app di e wega y ta haya tambe descripcion di contenido.

Tin 30 aspecto pa analisa. Eseynan ta entre otro detayenan mas specifico riba kico a conduci na cierto rating – for di e cantidad di sanger y heridanan, sex, substancianan manera alcohol y droga.
Tambe ta busca pa mira si ta menciona “elementonan interactivo”. Esey ta caracteristicanan adicional di e wega, manera e habilidad di e hungado pa comunica cu otro hungadonan, y compra di material of servicionan via di e wega of e app.
Na momento di cumpra un wega analisa tur e aspectonan cu ta skirbi riba e caha di e contenido, pasobra nan a wordo bon analisa door di expertonan. Ora di cumpra sigur sigui e conseho pa loke ta edad na cual e wega ta dirigi. No cumpra un wega pa un mucha di 5 aña si riba e caha ta skirbi pa mucha di 8 aña bay ariba. E descripcion di e contenido ta dunabo un idea di loke cu tin den e wega.
Loke por ehempel ta wordo analisa den e contenido ta: referencia na alcohol; na droga; violencia intenso; desnudez; gambling di berdad; violencia sexual y uzo di tabaco.
Di acuerdo cu e studionan haci na Merca y Inglatera, un di e contenidonan cu menos ta pone atencion na dje ta humamento. Den un encuesta investigadonan a descubri cu solamente 8% di weganan den cual tin humamento tin un descripcion di esaki.
Academia di Pediatranan Mericano ta sugeri pa mayornan pone un limite di tempo cu muchanan por pasa ta hunga wea. Ta un bon idea pa pone un video cu bo yiunan pa vigila con hopi nan ta wordo exponi na tabaco, droga y alcohol. Uza e tempo hunto pa reenforsa e posicion di boso famia pa cu e substancianan ey.